Miðhálendi Íslands eða miðhálendið er heiti sem almennt er notað um þann hluta landsins sem liggur inn af byggðum þess. Tengsl Íslendinga við miðhálendið hafa verið breytileg í aldanna rás og enn líta landsmenn ólíkum augum á nýtingu þess og nytsemi. Svæði utan byggða hafa jafnan verið kölluð óbyggðir. Á síðari árum hefur hugtakið víðerni hins vegar æ oftar verið notað í umræðum sem tengjast miðhálendinu og þá sérstaklega í opinberri umræðu. Hvað býr að baki þessari orðanotkun og hvaða hugmyndir liggja að baki þessum hugtökum? Í rannsókninni sem hér er kynnt var sjónum beint að uppruna þessara hugtaka, þ.e. víðerni, óbyggðir og miðhálendi, og að skilningi
Íslendinga á merkingu þeirra nú. Niðurstöður spurningakönnunar sem send var á úrtak landsmanna sýna að í hugum Íslendinga stendur hugtakið óbyggðir nærri lagalegri skilgreiningu stjórnvalda á hugtakinu víðerni eins og það er sett fram í lögum um náttúruvernd. Hugtakið víðerni skilja landsmenn hins vegar fyrst og fremst sem landslag sem einkennist af víðáttumiklu útsýni. Með tilliti til skilnings landsmanna á þessum þremur hugtökum sýna niðurstöður enn fremur að Íslendingar eru mun umburðarlyndari gagnvart mannvirkjum á víðernum en hvort heldur er á miðhálendinu og í óbyggðum.
https://natturufraedingurinn.is/wp-content/uploads/2021/07/1.-mynd-A-Gr1-NY-A.jpg|https://natturufraedingurinn.is/wp-content/uploads/2021/07/2mynd-viderni.jpg|https://natturufraedingurinn.is/wp-content/uploads/2021/07/Screenshot-2021-07-14-at-18.05.22.png|https://natturufraedingurinn.is/wp-content/uploads/2021/07/x-mynd-IMG_2892-2.jpg
